ABANYESHURI BIGA GUSUKA NO GUTUNGANYA IMISATSI (HAIR DRESSING) BISHIMIRA UBURYO BAKOMEJE KWAGURA UBUMENYI MUKWIHANGIRA UMURIMO

Itsinda rya mbere ry’abanyeshuri bari mu mahugurwa yo kwiga umwuga wo gusuka no gutunganya imisatsi (Hair Dressing) rikomeje kwitwara neza mu masomo yabo, aho bagaragaza umuhate n’ubushake bwo kuzaba abanyamwuga b’ejo hazaza.

Aya mahugurwa agamije guha urubyiruko ubumenyi ngiro bubafasha kwihangira imirimo no kwiteza imbere. Mu byumweru bishize, aba banyeshuri bamaze kumenya uburyo butandukanye bwo gusuka imisatsi igezweho, kuyitunganya neza no kwita ku isuku n’imikoreshereze y’ibikoresho by’akazi.

Abatoza babo bavuga ko bishimira uburyo abanyeshuri bakurikirana amasomo babikunze kandi bagashyira imbaraga mu myitozo ngiro. Umwe mu batoza yagize ati:

“Turabona impinduka nziza ku banyeshuri bacu. Uko iminsi igenda ishira, barushaho kumenya gusuka neza no kuganira neza n’abakiliya, ari na byo bizabafasha gutsinda ku isoko ry’umurimo.”

Abanyeshuri na bo bavuga ko aya mahugurwa yabahaye icyizere cy’ejo hazaza, kuko uretse ubumenyi bari guhabwa, banigishwa uko bakwitwara mu kazi no kwakira neza ababagana.

Biteganyijwe ko nyuma yo kurangiza amasomo, aba banyeshuri bazahabwa impamyabumenyi zibemerera gutangira gukora kinyamwuga, bamwe bashobora no kwihangira imirimo yabo bwite.

Ibi bigaragaza ko kwiga imyuga ngiro bikomeje kuba igisubizo ku kibazo cy’ubushomeri, cyane cyane mu rubyiruko rufite inyota yo kwiteza imbere.